(දිල්ෂාන් මොහොමඩ් විසිනි)
ඊයේ(08) පාර්ලිමේන්තු අමතමින් මහාමාර්ග හා ප්රවාහන අමාත්ය බිමල් රත්නායක මහතා, රජය ඉදිරියේදී ක්රියාත්මක කිරීමට යෝජිත අධිවේගී මාර්ග ව්යාපෘති පිළිබඳව පැහැදිලි කිරීමක් කළේය.
එහිදී, කටුනායක අධිවේගී මාර්ගය හලාවත දක්වා, එනම් දැදුරු ඔය පාලම දක්වා දීර්ඝ කිරීමට ජනාධිපතිවරයාගේ අනුමැතිය හිමිවී ඇති බවත්, ඒ සඳහා වන ශක්යතා අධ්යයනය (Feasibility Study) ළඟදීම ආරම්භ කරන බවත් අමාත්යවරයා සඳහන් කළේය.
සැබවින්ම, මෙය පුත්තලම දිස්ත්රික්කයේ ජනතාවට ඉතා ප්රීතිමත් ආරංචියක් බවට විවාදයක් නැත.
කෙසේ වෙතත්, මෙම නව අධිවේගී මාර්ග ව්යාපෘතිය පුත්තලම දක්වා දීර්ඝ කිරීම සඳහා වන ක්ෂේත්ර අධ්යයනයක් (Field Survey) සිදුකරන ලෙස මහාමාර්ග අමාත්යවරයා හරහා ජනාධිපතිවරයාගෙන් ඉල්ලා සිටීමට පුත්තලම දිස්ත්රික් ජනතාවට එළඹ ඇත්තේ සුදුසුම කාලයයි.
ජනාධිපතිවරයාගේ මෙම නව අධිවේගී මාර්ග යෝජනාව හරහා දැනට ක්රියාත්මක වන ජාතික භෞතික සැලැස්ම (National Physical Plan) වෙනස් වීමේ හැකියාවක් මතුව තිබේ. එම නිසා, මෙම අධිවේගී මාර්ගය ඉදිකෙරෙන්නේ කවදාද යන්නට එහා යමින්, නව ජාතික භෞතික සැලැස්මට පුත්තලම දක්වා වන අධිවේගී මාර්ග ව්යාපෘතිය ඇතුළත් කරගැනීමට මෙතැන් සිටම උත්සාහ කිරීම අතිශයින්ම අත්යවශ්ය වේ.
මෙම නව යෝජනාව තුළ, කොළඹ මෙන්ම අනුරාධපුරයද අධිවේගී මාර්ග ජාලයේ දෙවන ප්රධාන මධ්යස්ථානය (Central Hub) බවට පත්කිරීමේ සැලැස්මක් ඇති බව අමාත්යවරයා පවසන්නට උත්සාහ කළේය. නමුත්, වෙනත් පාර්ලිමේන්තු මන්ත්රීවරයෙකුගේ බාධා කිරීමක් හේතුවෙන් අමාත්යවරයාට තම පැහැදිලි කිරීම අතරමග නතර කිරීමට සිදු විය.
අමාත්යවරයාගේ පිළිතුර පදනම් කරගෙන බලන විට, අනුරාධපුරය දෙවන මධ්යස්ථානය බවට පත්කළහොත්, මෙම නව අධිවේගී මාර්ග ජාලයට පුත්තලමද ඇතුළත් වීමේ ඉතා ඉහළ සම්භාවිතාවක් පවතී.
එබැවින්, මෙය දේශපාලන මතභේදවලින් ඔප්පුවී පුත්තලම දිස්ත්රික්කයේ සියලුම පාර්ලිමේන්තු මන්ත්රීවරුන් එක පෙළට සිටගෙන කටයුතු කළ යුතු කරුණකි.
පුත්තලම දිස්ත්රික් පාර්ලිමේන්තු මන්ත්රීවරුන් සියලු දෙනා එක්ව ජනාධිපතිවරයා හමුවී, කටුනායක-හලාවත අධිවේගී මාර්ග ව්යාපෘතිය පුත්තලම දක්වා දීර්ඝ කිරීම සඳහා වන ක්ෂේත්ර අධ්යයනය සිදුකරවා ගැනීමටත්, අනාගත ජාතික භෞතික සැලැස්ම තුළ පුත්තලම දක්වා වන අධිවේගී මාර්ග සබැඳියාව තහවුරු කිරීමටත් උත්සාහ කළ යුතුය.
එලෙසම, රජයේ පාර්ශවය නියෝජනය කරන පුත්තලම දිස්ත්රික්කයේ සියලුම පළාත් පාලන ආයතන සභාපතිවරුන් ද (මහ නගර සභා, නගර සභා සහ ප්රාදේශීය සභා) මෙම උත්සාහයට එකතු විය යුතුය. මෙම ඒකාබද්ධ ප්රයත්නය සඳහා අපගේ උපරිම සහයෝගය ද ලබා දෙන්නෙමු.
විපක්ෂයේ මන්ත්රීවරුන්ගෙන් කෙරෙන කාරුණික ඉල්ලීම:
“මෙම ව්යාපෘතිය පුත්තලම දක්වා දීර්ඝ කළ යුතුයි” කියා පාර්ලිමේන්තුවේදී වචනයක් කතා කොට, වෙනත් මන්ත්රීවරුන්ගේ කැපවීම මත එම ඒකාබද්ධ උත්සාහය ජයගත් පසු, “අපි පාර්ලිමේන්තුවේ කතා කරපු නිසයි මෙය සිදු වුණේ” යැයි කියන පුරුදු ගැලරි දේශපාලනය කරුණාකර මෙම කරුණේදී අත්හරින්න.
ඊට පටහැණිව, පක්ෂ දේශපාලනයෙන් ඔබ්බට ගොස්, පුත්තලම දිස්ත්රික්කයේ දීර්ඝකාලීන සංවර්ධනය පෙරදැරි කරගෙන මෙම ව්යාපෘතිය සඳහා අවංක සහයෝගය ලබා දෙන්න.
උත්සාහ කරන්නේ අප සියලු දෙනාම නම්, ඉන් ජයග්රහණය කරන්නේ පුත්තලමේ ජනතාව වන අපමය.