සියලුම ජාත්‍යන්තර ක්‍රිකට් තරග සඳහා අදාළ වන නව රෙගුලාසි මාලාවක් ජාත්‍යන්තර ක්‍රිකට් කවුන්සිලය විසින් ප්‍රකාශයට පත්කර තිබෙනවා. ඊයේ සිට ක්‍රියාත්මක වන මෙම සංශෝධන මගින් තරග ප්‍රමාදය වැළැක්වීමට විශේෂ පියවර ගෙන ඇති බවයි වාර්තා වන්නේ.
ඒ අනුව, පන්දුවට මුහුණදීමට කාලය නාස්ති කරන පිතිකරුවන්ට දෙවතාවක් අවවාද කිරීමෙන් පසු, 3 වන අවස්ථාවේ සිට ප්‍රතිවාදී පිලට දඬුවම් ලකුණු 5 බැගින් ලබාදීමට තීරණය කර තිබෙනවා.
මීට අමතරව දිවා ටෙස්ට් තරගවල මන්දාලෝක බාධා මගහරවා ගැනීමට රෝස පන්දු භාවිතයටත්, T20 තරග සඳහා විනාඩි 15ක ස්ථිර විවේක කාලයකටත් අවසර හිමිවනු ඇති. ක්‍රීඩාවේ වේගවත්භාවය සහ ගුණාත්මකභාවය ඉහළ නැංවීම මෙම වෙනස්කම්වල ප්‍රධාන අරමුණ බව ICC පිරිමි ක්‍රිකට් කමිටු සභාපති සෞරව් ගංගුලි මහතා පවසනවා.